بنكتب لمين
بنكتب لمين ؟
سؤالك فتنى
كأنى مغنى
بابيع طهر فنى
عشان الفلوس
سؤالك لطمنى
قسمنى
هزمنى
مكنتش بافكر بنكتب لحاجة
واهو أى حاجة مجرد نصوص
ولا كان فى بالي انى باسرق ملامح
ومعظم حروف القصيدة لصوص
سؤالك كشفنى
كأنى فى وضع وهناك اللي شافني
كأنى فى حلم
ويادوبك حاضنها
وهادخل سنينها
واقرب وادوس
يادوبك هاقولها
باحبك وابوس
أتارى الحياة بتزاولنى ياسيدى
وان اللي شوفته يادوبك كابوس
ف لازم احدد واغير واجدد
وضوء القصيدة وأصفى النفوس
ف باكتب لأن الحياة مستحيلة
وبايخة وتقيلة
وانا ف اعتقادى الكتابة وسيلة
وممكن تاخدنا لمناطق جميلة
نشوف الحقيقة فى صورة عروس
وباكتب عشان اللى واقف بفاسه
فى وسط الحزانى يكوم سنين
عشان اللى قاعدة بتحلب عينيها
فى حجر اليتامى وتعمل عجين
عشان اللى ممكن يصوم الفريضة
ولكن ظروفه الفقيرة مريضة
فقرر يلم الحروف الطريدة
ويمشى يبيع البكا عرقسوس
وباكتب كأنى باقود المعارك
وباهزم بقلمى كتيبة مبارك
وبادعى الغلابة اللي عاوز يشارك
بلدنا وولادنا وتارِك وتارك
وبانده يامصرى نهارك نهارك
وباسند بصوتى ديارى وديارك
وباعلن علي الصبر حرب البسوس
وباعمل حروفي رغيف البطاقة
وبادعى المعانى تكون الغموس
وباكتب عشان النجوم الوليدة
تحب القصيدة
وتقعد سعيدة مابين الشموس
وباكتب عشان الميزان اللي مايل
وحيط الجيران اللي خايف وآيل
باحاول أوفر لبكره البدايل
ماهو الكفر زايل
وحتما تعوز الماكينة التروس
عشان فجر غزة
يشقشق بعزة
ينادى المنادى الصلاة فى السودان
وباكتب كمان
عشان المدينة ومكة الحزينة
ونلحق نطفى نيران المجوس
وباكتب وباكتب
وطول ما احنا فينا اللي فينا هانكتب
ومهما اللي شاف الحقيقة بيكدب
هنفضل نعافر
ولو خلَّعوا من إيدينا الضوافر
ولو يصلبونا مفيش حد كافر
مفيش أى شاعر ولا أى ثائر .
.فى وسط المظاهرة
يحب الجلوس
……………….
شعر: حمدى موسى
