ثقافة و فنمصر اليوم
لسه باحلم
لسه باحلم بالدفا
يلف البيوت
يفرق الأفراح ندور
يخضر الأحلام
تنبت فى النفوس
لو حتى بور
نفسى أزرع فى القلوب
بستان زهور
وأفرح بخيرنا يتولد
جوه الماجور
لما ستى تقوم تدور
ع الطحين
والبيت بطين
وكأنه قصر من القصور
والديك بيدن ع السطوح
والعيشة كانت فيها روح
وتلمنا لقمة فطور
والأرض تشرب م العرق
تملى الشقوق
تبدأ تفوق
والفاس تزغزغ بطنها
تخرج سنابل حبها
فرح وبخور
والفرحة جاية بالحصاد
مع قوت وزاد
والحمد يعلى فى فرضنا
ما الرب حارس جمعنا
حياة بتجري فى دمنا
ازاى تموت
…………..
شعر: سيد بكر
