القصيدة اللي ما تشبهنيش

بداية حياتي نوڤمبر

وهابدأ قصيدتي بذكره

خريفه اللي أوشك خذلني 

برغم اني مولود في حضنه

ديسمبر ماجاش السنة دي 

لكوني ما حسيتش بيه

يناير في ألفين حداشر 

قصدت اني ما اظهرش فيه

مسكت القلم 

قلت هاكتب 

 وما اسألش حتى عليه 

وغمضت عيني لقيتني ..

بانط الشهور الكبيسة 

وفبراير اخره اسبوعين ..

و مارس ماجاش زي غيره ..

و إبريل مناسبة ف حياتي

كتبنا الكتاب يا حبيبتي 

 و فجأة لقيتني في مـايو 

ومايو دا يومه بيومين

خصوصاً لو الشنطة تقلت 

وفاضل كتير ع المحطة

ومستني نفسي في حتة 

ما تسمحشي أبقى في ورطة

وباتحملك يا بلادي 

عشان اتكتب لي أعيش 

وجودي مهم وحقيقي 

لكن في الحقيقة مافيش

ماليش غير حقوق مش طايلها 

 عشان مش لاحقها

ويمكن ماليش ..

 بس بـاحلم ..

تعدي السنة دي بخير

ويونيو هـييجي هـييجي ..

برغم الخراب اللي فيه 

وملحوظة ..مش قصدي حاجة ..

غير اللي انتـو حسيتوا بيه

وأحيان بـاحس البداية ..

في يوليـو المجيد

واهو الماضي عدا علينا

ومافاتشي

معلم في كل البيوت والشوارع 

معلم في كل اللي نازل

وكل اللي طالع

بـييجي ف أغسطس 

وياخد في وشه 

حاجات م اللي عينك عليها 

وقلبك معاها

و سبتمبر احول بطبعه

يهل بخريفه

مايكرمشي ضيفه

يقول احنا لسة 

في شهر الـ مافيش

في أكتوبر أعبر يا صاحبي 

بقينا ف نهاية القصيدة 

وسيبني أعيش

……………….    

شعر: أحمد السراج أبو شمس