باقولك إيه ياسيدنا البيه
سامحني الأربعة بجنيه
أنا يابني تعبت كتير
خلاص الشمس هاتروّح
ولسة واقفة بالجرجير
وادينى هاقوم…
إيديك الحلوة تسندني
ف مَد إيديه
طب استنَى سيب القفة
و عندى سؤال
ملاك الهيئة والصورة
ماشالله عليك
وهارجع روحي مجبورة
ف ليه طيب
مدارى عنيك؟
بتمسح دمعة فى المنديل على حالي!
أنا والله مستورة
تعالى و شوف
لكن دهري حنى ضهرى
ماعدتش اشوف
ف خدلك حزمتين مني
تخفف برضه عنك حِمل
دى حاجة بسيطة معلهشى
هتقبَلهم هاقوم امشي
وشيّلني على راسي
ماتبقاش كالزمن قاسي
ياريت القفة ماتاخدهاش
حَوايتى ياريت ماتعوجهاش
قعاد الأرض صار عادة
وغيرها يابني لا مالناش
بإيدنا عليها وسناننا
أهو ماسكين
كفاية قلوبنا محروقة
على فلسطين…….
ولو لازم تاخد قوتي!
وماله يابني مايضرّش
أنا الأم اللي صابها كتير
ساترني رزقي م الجرجير
جنازة ابني كالزفّة
وريحة دمه كات حنة
ف مش زعلانة ع القفة
عوَضْها يابنى فى الجنة
