كلام ستي
و أكلم نفسي ع الأحلام
تقولي أهمد
و نام بدري
دا عمرك عدى و بيجري
و قطر الحزن مستعجل
راكب مجري
تقولي بحال لسان ستي
يا واد حالك بيوجعني
صوتك مكسور و متأثر
حالك مايل و متعسر
أرد بقوة من جوه
هاقوم يا ستي و هاكسر
و لا عمري راح أتأثر
تفوت أيامي مهما تفوت
راح أسبقها
و مهما تذل أنفاسي
هييجي اليوم و أزوقها
و تلبس طرحة من إيدي
يا ستي الحاجة متشكر
عارف إنك
كضلّ الروح بيحميني
و إنك خايفة أروح منك
و إن عنيكي شايفاني
في سن طفولتي قدامك
يا ستي راح أبقى فوق الكل
لكن راح أظل خدامك
بقوة عزم أحلامي
هاهد الكون
و أدوس ع الذل
و حق كسرة الأيام
و مرّ العيشة و الضيقة
و حق إنك يا ست الدار
أوفى حبيبة و صديقة
هاخلي الكل يتحاكى
باسم ابنك
يقول مجدع و ساب مجدع
و مهما الواقعة تئلمني
هداوي الجرح بدعاكي
يارب تكون في يوم عايش
هاعيش يا جدتي و أبني
هاسيب كل الجمال لابني
و مهما يكسَّروا المجاديف
رغيف بالملح يشبِعني
و مهما يعلوا في الحاجز
هاخلي الدنيا تسمعني
فنامي يا ستي و ارتاحي
ابن ابنك كبر سنه
و شق العمر في ضلوعه
دعاكي لسه في وداني
يشيل عنك أذى الحساد
و يئذي اللي يقف ضدك
و فاكر جملتك دايماً
مادام صابر
هتحلى يا واد
……………….
شعر: عبدالتواب الرفاعي
