ثقافة و فنمصر اليوم
مش هاتمشوا
مش هاتمشوا
حتى لو بان النهار
مهما كان حجم انتصاركم
وانتهاء الذل والخوف والحصار
الحكاية مش أسد ولا هى فار
أيوه غار بشار فى داهية
أيوه غار
لسه ف الأحلام مناورة
وفيه نفوس محتاجة ثورة
وفيه قلوب عاوزة إعادة لانتشار
لسه فيه ف الأرض حفرة
ولسه فيه ف الكره وفرة
ولسه فيه ف الجو نار
ثم إن الدور دياركوا
واحنا أهل وبيننا دم
وغصب عنكم مش اختيار
مش هاتمشوا
يا سيادة الشعب اقفل المعابر
والمنافذ والموانى والمطار
أقفلوا قلوبكم عليهم
أى سوري احبسوه
ف القلب و اوعوا تتركوه
كتفوا بالحب عمرك
شوفت ساعة الجد أخ
يسيب اخوه
تبقي عيبة وتبقي عار
مش هاتمشوا
لسه فيه ف الروح أماكن
لسه ف الأحضان مساكن
كل نظرة وفيها ضلة
وكل ضحكة وفيها دار
هى مش محتاجة لكن
واحنا أصحاب القرار
مش هاتمشوا
لسه فيه سيناريو وحوار
………………………
شعر: حمدي موسي
