شعر/ رضا المناوي
“بحبِك آه”
لقيتِك وسط زحمة و ناس
و دوري و كاس
و دقة زار
عيونِك دار
سكن قلبي
سألت النُخبة عن شِعرِك
قالولي العُمق متخبّي
فـ جُمل تايهة
يا أجمل نَص
انا قريته
و خبيته
غرِقت فـ بحرهُ و فـ بيته
مـ الاستِهلال و حتى الخاتمة
انا داااايب
يا سِت الحُسن انا شاايب
معاكي رجِعت لـ” الأولى ”
” و نَـط الحَبل “
و ” عقرب ” من ساعات عُمري يلفّ العكس
يلدغني
و ازوّغني
من الحصة و م الأيام
خلاص ما بقيتش انا اتسنبط
ولا اتكلثِم
بقيت عايش في مهرجانات
و بهلونات
و اشوف” بلياتشوهات ” اكوام
و اضحكها بأحلى كلام
بقيت زاهِد
بقيت تايب و كُلي ” ايمان”
بقيت فهمان وبيكي اكيد
انا الكسبان
و اجري الصبح على حِلمي
على ” تريد ميل ”
و ابعت ميل
و الاقيكي
و ارقص ” تانجو “
لعنيكي
يا سِت الناس بادوب فيكي
يا نور العين يا ضحكايا
يا سِرّ و عَلني جوّايا
يا صِدق الحُب فـ مرايا
انا الزاهِد بطول عُمري بقيت
بهواكِ متسوِّل
بيتحوِّل
رجل أعمال
اشوف مولانا
فـ الرؤية يفُك اعمال
طلاسم حِلمي م اللفة
و إني
عريس بدون
كوشة بدون زفة
معادي معاكِ كان صدفة
في واقع بس كله خَيال
يا بنت الإيــــه يا لذين
بحبِك آه
