حبة دفا

من رمش عينَك حاسس اني باعرفَك
نفسي اخطفَك
عايز أقضّي الباقي من عمري هِنا
فاكر زمان كان ليّا بيت يشبه لِ دَه
أو يمكن اكبر حبّتين
كان ليّا إبن بيشبهك
ما اعرفش يا ابني طريقه فين؟
سيب البيبان ..
والشيش دا سيبُه ما تقفلوش
عُمْر الدفا ما يضُمّنا
طول ما احنا وحشانا الوشوش ..
عارف يا واد
وحَشْني ضِحكي ودمعتي
نازلة بترقُص ع الخدود
ولمّة العيلة ف سريري
م المِسا لحد الصباح
الكل راح
وكويّس ان انت اللي جيت
شايف كتير م الأسئلة من بين عينيك
مِتعشّمين في الأجوبة
علشان نسيت! بس افتكرت
كان ليا واد
شخبط بإيده ع الحيطان
كان غاوي رسم
فاكر يا ولدي وقتها
كات شجرة فاردة ضلها
على شكل أم بس المهم
فينك يا ولدي من زمان باسأل عليك؟
بابعت حيطان الأوضة يمكن تلمحك
سايب معاها رسالة ليك لو كنت جيت
حبة دفا ده الكرسي واحشُه مطرحك
عُمْر الدفا ما هو بالغطا ولا قَفْل شيش
ولا حد جاب لي لُقمتي ولا غدّانيش
كان نفسي يا ابني حد يسمع غنوتي
ملضومة فيها شَكْوِتي ما سمعتونيش
مُش بالكراسي المُدهبة
والفرش دا وحبةصوَر
ولا بالهدوم متكوّمة
مِتْشالة في شنطة سفر
ولا كام مجلة جنبها مية ودوا
ولا رش عطر على الستارة
يقصد تجديد الهوا
أصل الدفا مُش باستراق
السمْع من خلف الأُكر
أيوة الدفا مُش باستراق
السمْع من خلف الأُكر

كلمات
فاطمه الصعيدي