شعر/ فاطمة الصعيدى
“حواس القلب”
لو جيت في يوم ونسيت
كام ساعة عدوا حبيبي أو أكتر
طال انتظارك وانت متأثر
واقف بتقنع يومنا ما يعديش
وتشد عقرب للثواني تقول
ثانية كمان هتجيني أو ماتجيش
كام مرة دمعة ف ضحكِنا
حبّت تغازل خدّنا في سلام
كام مرة توهنا ف بعضنا
كام مرة كلمة تضمنا وتلمّنا
ف نقوم نكف عن الكلام
كام مرة يبقى سكوتنا بوح
كام مرة كات حكاياتنا نُووح
بس افتكر ..
الأرض من تحت القدم يومها اشتكت
من ضحكة لمَست خدها
من وقتها حضن البكا مفتوح
وبنخدع القلب انها دمعة فرَح
فاكر كمان لمسة إيدينا في السلام
وعنينا تحكي بدون كلام
وبنمشي من غير حتى ما نرمي السلام
علشان قلوبنا مسلّمة
مستسلمة لأمر الهوى
كام مرة بوحنا بسرنا والسر تاه
كام مرة قلنا الضحك لازم يتسرق
نضحك معاه…
وحشتِنى حباية البلح لمّا بإيديك
سيبت النوى لجلٍ ينبّت خير
إحساسنا كان ياحبيبي غير
بالبونبوناية السايحة من فترة
وبلفظ قلته وكان بعفوية
ضحّك علينا الكرسي في السهرة
والدمع رغرغ بص ف عنيا
الفرْح رافض يمشي ويفوتنا
والصمت قوتنا وضحْكِنا فطرة
على مج كان كارِف هوا مغشوش
وساعتها قلت الشاى مانشربهوش
وحشنى رص وَرَقنا بالواحدة
ووحشني قولِة بس على مَهلِك
دموعي يومها في الرموش سِكنِت
وغصب عنك أو لسانك زَل
قولِة حبيبتي مَرة على مَرة
أقول بجد يكون مايقصدهاش
ألقاها رجعت تاني للكَرّة
ساعتها قولة بت كات حلوة
بالظبط طالعة تقولشي كات غنوة؟
واللحن مش معمول على الآلة
اللحن وحده هوّ كان حالة
إياك في وقت زعلنا تبقى نسيت
دا القلب كل حواسّه شغالة…
