شعر / رضا المناوي
“سبت “اتفقنا من البداية
مش مهم تكون معايا
بس تفضل جوّة قلبي
زي صورتك في المرايا
انت حدّ فـ حدّ ذاتهُ
مِش بيشبِه
أي حدّ
من ميلاده ليوم وفاتهُ
مِستخبي هزار و جد
انت حدّ
كان و راح
كُنت دايماً مُستباح
كُل شئ عندك
مُباح
بس لو عوزْت
إتصالي ..
تلقى خطّ الليل
يا عيني .. غير مُتاح
أرجو اعمل يوم لنفسك
خلي بابك .. باب جديد
والشجر ..
خليه يمِد
الأصيل ..
يكرم في بيتهُ المُستجدّ
مش كفاية تروح بعيد
اصنع الأفراح ..
وغني
عين ياليل ..
جوّة نفسك
كله يعمل لك حساب
لما تعمل مرة حَدّ
عيش يومين .. بَـرّة سـدّ
جِـوّة سَدّ
المهم تكون .. أسد
انت معجون .. في الأماني
مش هاسيبك .. لو ثواني
الكلام حلو فـ أغاني
انت كُنت الشاب .. و شِبت
كنت ماسِك بس سِبت
انت حَدّ كتير بتقلِب
تبقى ..
سَبت
خُدها مِنّي كِلمة
جدّ ..
انت حَدّ فـ حَدّ
ذاتهُ مِش بيشبِه
أي حَدّ .
“سبت”
