يسرا اللوزي تكشف تأثر أسرتها بدورها في “لام شمسية”

نورهان عيد 

كشفت الفنانة يسرا اللوزي عن تأثر أسرتها بدورها في مسلسل “لام شمسية” والصعوبات التي واجهتها في حياتها الخاصة مع زوجها وأولادها، بسبب هذا الدو الذي يُعرض ضمن السباق الدرامي الرمضاني الحالي ويحقق نجاحاً كبيراً.

قالت اللوزي: “الشخصية صعبة ومركبة وأصعب حاجة فيها إنها مش بتتكلم كتير وأن كل مشاعرها، تعبيراتها تبين كل حاجة، اتعلمت في التجربة دي إن دا بيكون أصعب على الممثل من أنه يتكلم، استسهالاً في الكتابة الضعيفة بيكون في مونولوج أنا حسيت بكذا بيقعدوا يسترسلوا في كلام في حين إن اللغة السينمائية والشاشة موجودين عشان الصورة والكادر اللي يحيكي أكتر من الكلام”.

تابعت: “على قد ما الدور صعب ومرهق نفسياً إلا أنه ممتع أنا لسة بصور مبسوطة إنه هيخلص بس هتوحشني “رباب” رغم الصعوبات”.

عن تأثير الشخصيات الصعبة فيها وفي أسرتها، قالت يسرا اللوزي: “في المطلق عادة مش دايماً بقول إن الدور بيفضل تاعبني بعدها ولعبت كذا دور كان صعب نفسياً لما بيفوت شهر أو شهرين من التصوير وعندي شغل طول اليوم وبقضي معظم اليوم في الشخصية أكتر من شخصيتي بحس بتقل وفي البيت أولادي وزوجي بيحسوا إن فيا حاجة مش مظبوطة فغالباً آه بعد المسلسل هياخد وقت، مش متقمصة الشخصية في البيت لكن التقل اللي على صدري منها”.

عن الانتقادات التي طاولت المسلسل وفكرته، قالت يسرا : “أولاً الانتقادات دي ناس مش عايزة تشوف الحقيقة خايفين يشوفوا نفسهم في المراية الموضوع مهم وشائك وموجود بكثرة أكتر مما نتخيل، الشائك في الموضوع إن المتحرش بنتخيله شكل شرير أو هيئته واضح عليها إنه متحرش لكن دا جرس إنذار إنه بيكون من ناس مقربين الموضوع مهم ويستحق إننا نتطرق ليه”.

المسلسل من تأليف مريم نعوم وورشة سرد، وإخراج كريم الشناوى، وبطولة: أمينة خليل، أحمد السعدني، محمد شاهين، يسرا اللوزي، ثراء جبيل، وصفاء الطوخي.