شبه حياة
الوِرد الدايم م التسابيح
وصلاة الفجر وتساهيلها
والكون بيفتَّح حواديته
والشمس بتبعت مع نورها حبة تفاصيل
وبتعمل ديل مع ليل كان مستحلي سكوتها
فبتصحي توزع بسكوتها
ونِحس الطبيه ف ضحكتها ونِحس أمان
واليوم بيرتب افكاره
فنجان الشاي وحَنين رغاي
اشجار بتوشوش عصافيرها
ونهار بيصَبح ع المخاليق
أسرار حواديت
مشاوير وياعالم رحلتها هتكمِل فين
ودواير دايره ونحسبها
نلاقينا ف نقطة مابدءنا
حريف الحزن بيسرقنا
وقصاده الحلم لاله معني ولا له تعريف
ونعافر أد ما بنعافر
ونقول أهي هانت وهنوصل
وبدال مابنمسك ف حقيقة بنمسك ف مفيش
واليوم وبرغم إنه ف حيرة
مضطر يكمل ويانا
ووشوشنا الساكته البهتانه
زايداه تشويقا وإثاره
ومابين متاهات وهَزل وثبات
وفرح وأهات
ونفوس بالرضا قادره تواجه
ونفوس كَسَّرها الخوف مرات
ومعارك بالكوم خوضنها ومشاعر غصب قتلناها
ولا طولنا النصر وعدينا ولاحاجه بتمشي علي هوانا
صفحات تتقلب جوانا
علي ناصية أحساسنا بترسي
وبتكتب شعر عشان ننسي
ونحس إن الأيام لسه فيها شبه حياة
واليوم لساه برضو مكمل رغم المعاناه
وساعاته بتفقد توازنها والشمس بتتعب وتروح
والليل يغشاه
والكون بيقَفِّل حواديته فيحس أمان يسري ف روحه
وهدوء وسلام
يضطر يسلم مفاتيحه ويخش ينام
شعر: ولاء البركاوي
