وماغلطتش عشان حبيت
ما كل الناس يا ناس بتحب
قالولي خلاص ياواد طبيت
ورجلك فين ياواد بتدب
ومغلطتش عشان حبيت
وغيري عويل وبيحبك
ولو ذنبي اني مرة هويت
هاعيش وافضل كمان جنبك
وليه قلبك ماهوش زيي
وليه حبك ماهوش ضيي
ولسه العتمة جواكي
تخبي النور
وتسرق من بواقي الليل
نجوم خايفة النهار يطلع
فاخاف وارجع
وانا لوحدي اللي باتوجع
ولا ف وشك بوادر خير
تخلي القلب يتشجع
وتنصف قلبي م الأيام
تجيبلي حقي من بكره
من امبارح
ومن يومي اللي مش عايشه
بكيفي كمان
برغم ده كله حبيتك
وحسيتك
وسميتك يا ست الكل
رويتك من حنان قلبي
سقيتك بالغرام فدادين
عشان تطرح عينيكي الحلوة
من خيرك
جناين فل
وحبيتك
ومغلطتش عشان حبيت
وشفتك قمرة في عنيا
وأجمل بنت ساكنة البيت
ويوم ماعنيكي قابلتني
خدتني بشوق وسحرتني
جِمِد قلبي ونسيت نفسي
لا خفت ف مرة ولا خبيت
ولو سألوني مين انتي
هاقول معرفش
عشان من نظرة في عنيكي
أنا طبيت
وايه العيب يا مولاتي
يا سر سعادتي في حياتي
يا شاغلة كل أوقاتي
وواخده حتة من ذاتي
رسمتك في السما نجمة
وشفتك طيف
بيتحدى الخيال والشوق
وشفتك برضه وعرفتك
رقيقة وزوق
وتهت كمان في ملكوتك
عشقت النظرة في سكوتك
عشقت اسمي على لسانك
ونبرة صوتي من صوتك
برغم ده كله سايباني
وامتى بجد على ايدك
هاحن واروق
ياخوفي الوهم يخطفني
واعلق نفسي في حبالك
ألاقي الشوق حبال دايبة
مابتعلمشي قلبي يفوق
ألاقي الشوق حبال دايبة
مابتعلمشي قلبي يفوق
………….
شعر: محمد ياسين الكاشف
