ما دمتِ بعيد
ما دمتِ بعيد ومش شايفك
فتلك مصيبةٌ أخري
وبالأحري أكون عارف جرالك إيه
فده يأكد ويثبت لك
بإني ف بعدي عن قلبك
مازلت ضرير
وتايه مني عكازي
وقلبي ف بعده عن قلبك
ماعادش بخير
يا سر كتمته جوايا سنين وسنين
ياسبب العلة والكسرة
باحس ف قلبي ميت حسرة
ونار جوايا بتولع في أحشائي
بألف الدنيا مش لاقي
ومش عارف أشوفك فين
يا فكرة ف راسي بتدور علي تفسير
صداع دايم بيسري في مخي
مش قادر على صده
ولا بألفين نفس نيكوتين
ياصوت متحاش
ومش سامع صدى رده
يا فرح مجاش
ومش فاهم سبب عِنده
ياقاتلة العمر بقساوتك
وسايبه سنينه حيرانه
وبتدور على فرصه
عشان تتعاش
يالحن حزين ومش قادر
على عزفه ميتين نوتة
يابنوته ياحدوتة
يا شاغله الكل بجمالك
حياتي صعبة من دونك
في بعدك مستحيل تتعاش
عيون الناس بتسألني حبيبتك فين
بأشوف الجملة ف عيونهم
ونفسي بجد اطمنهم
جميع أحوالك الحيرى
بحق العيشه والعشرة
وكام عشرة ودور كامل من الطاولة
وانا ماسك في إيدي الزهر
وخايف أرمي ف غيابك
أشيل اللعب والتطبيق
ماعدتش أطيق
مرار بعدك ماعدتش أطيق
تعالي نكمل اللعبة
ونبني للغرام كعبة
نطوف حواليها ونسبح بإسم الحب
ونرمي الفُرقة وشيطانها
بحفنة كبيرة م الجمرات
ونرسم قلب ع الرمله
بحضن إيدينا نتمشى عشر اشواط
نروح للحب عند الباب
وناخد ايده ف ايدينا
نلف الكون
نحرر كل شوق مسجون
نصالح عمرنا الباقي
وإيد مع إيد هوانا يزيد
نفرق منه ع الأحباب
نطلع صدقه من شوقنا
على العمر اللي ضاع منا
ونضمن جنة ما يجيبها البصير بالشوف
ويشتاق ليها ميت ملهوف
ويترصوا الأحبة ألوف
ونكسب أجر لمتنا
تزيد بالحب عشرتنا
ونهتف للغرام حباً
يعيش الحب للعشاق
يعيش الحب للعشاق
………………..
شعر: هاني النجار
