آخر ساعة ف عمر الوقت
وَرّيني ايديكِ
ممكن أدفِس إيدي الناعمة
جوَّا شقوقها
ممكن يجري دم إيديا
ف قلب عروقها؟
طب ممكن أدخُل جواكِ
تتونس روحي بمعشوقها
طب ممكن تمسحي قدامي
معلقةْ القشطة وبلسانِك
والله ما نِفسى هتجزَع
ولا تتمنع تاني خلاص
نَفسي المايعة نِفسي أسندها ..
بْطعم إديكِ
أنا نِفسي ف حِجرِك
امرمغ ذنبي ف وسطه و أتوب
أنا عايز اطَهَّر نفسي وقلبي
وأبريهم من أي عيوب
أنا هفضل جنبِك
واصبر أكتر من صبرة أيوب
نِفسي ارجع عيل وادخل حضنك
يمكن أصعب ع المكتوب
الله ع الضحكة الرايقة
من بين الِسِنِّة المخلوعة
الله ع الهمسة الدايبة
اللي بتشفي الحتة الموجوعة
الله على إيدك
مَسنَد ليَّ ف حلم جديد
من برة الوقت
غرقان في رضاكِ
عشمان ألحق آخر ساعة
ف عمر الوقت
لازمتها دموعِك ايه دلوقت
أنا عمري ما شُفت الدمعة ف عينِك
دا انتِ ف عِز النُكتة البايخة
بتقومي ضاحكة
وتجبري خاطري
ضحكةْ قلبِك ليَّ ساعِتها
زَيْ الدعوة اللي ما تترد
اصلبي طولك يالّا وقومي
نِمشي شوية ف وِسط الأوضة
ولّا تكوني عايزة أشيلك
زَيْ عروسة ف ليلةْ الدُّخلة
والله وِشِّك أحسن منها
شكلُه موَرَّد زَي الدم
طيب حاضِر
ما انا هَتْلَم
بس تعالي
إيدي ف إيدِك
واحدة بواحدة نخطّي العتبة
صعبة عليكِ؟
يالّا نريَّح تاني شوية
إوعي تنامي
ممكن بس تريَّحي عينِك
بس اوعي الترييحة تطول
لأ أرجوكِ
لِسَّة شوية
إفردي جسمِك
وانا هفرد جنبِك أيامي
وارجع عيّل
أدخل حضنِك
واصعب ع المكتوب من تاني
………………
شعر: محمد الخضري
