فتحت القلب علشانك

سبحان اللي خلانا

نحب الشعر والشعراء

ونبقى أحباب

سبحان اللي جمعنا

وكان بيسبب الأسباب

وسبحانه عشان رزاق

وسبحانه عشان وهاب

فتحت القلب علشانك

برغم أني قفلت الباب

زمان أنا قلبي كان عاصي

صبح دلوقتي يستغفر

وحن وتاب

بحبك حب كله ثواب

وعدتك بيتنا يتأسس على الإخلاص

مافيش فيه خصام

مافيش عتاب

هنكبر مهما راح نكبر

هيفضل بيننا حب شباب

بحبك ضعف ما حبيت

وانا لسة ف سنين جامعة

وإعدادي وفي الكُتاب

غياب وحضور

حضور وغياب

بحبك حب يتدرس

وله موقع من الإعراب

عشانك بس هاكتب شعر

وهاكتب فيكي 100 قصة

وأجيب مأذون في كتب كتاب

خلاصة قولي يا حبيبتي

نِشاني كان تملي يخيب

لكنه معاكي فعلا صاب

……………….

شعر: أحمد مغربي