بقالي كتير ونفسي أفرح تعبت أشرح وعندى شهود بقالي سنين أفسر معنى مش موجود مفيش ولا أى حاجة تسر قلت استنى فرحة تمر محصلشي رجعت عملت خلفا در زرجن قلبي مدخلشى بقيت واقف علي الأعراف مابين الحزن والقهرة وأنا مش غاوى للشهرة عشان أبقى ف مكان مخصوص واقف بلبوص وتوب الحزن يكسينى وتتفرج عليا الخلق تعرف سرى من عينى وأنا ذنبي أن أهل الحب طلعوا لصوص وسرقوا الباقي من أحلامى وحنيني وباعوا بذر ضحكتنا طويل التيلة بالصينى وأنا محسوب علي كبيرهم عشان قلبي أبوه مصرى / فلسطينى ونفسي أفرح أبص شمال مفيش فرحة أبص يمين طيور جارحة وبلد قارحة وحاجات سارحة ترش الحزن ع الطرقات وكل ما أروح أزور صاحب يقولك مات باحس أن الحياة انتقلت لعالم تانى وإن أحنا هنا أموات مصيبة كمان معادش أخوات أسامى أتلخبطت ووشوش نسب مغشوش مفيش رابط مابين الود ومصادره جحا مبقاش بيدهش حد بنوادره معادش حدود فى زمن الولعة والنمرود وأدى أحنا وأصحاب الأخدود بقينا ملك( ذى نواس ) هنفرح أمتى مش عارف فى دنيا فقدت الإحساس ياريت نكتة ولو بايخة تغير لون وشوش دايخة تغير ريحة الأنفاس ................... شعر: حمدي موسى
