عشان غلطة

عشان غلطة نزلت الارض
عشان قطمة من الشجرة
ومن يومها و انا تايهة
ولا عارف اجيبها بطول
ولا عارف أجيبها بعرض
ونفسي فوق
رمال الوهم
تحدفها رياح
الحزن والمطرة
ولا كلمة تدفيني
و أحلامي يجرحها
خدوش الليل على صخرة
و عقلي فوق
رصيف الموت بيتسول
وترميني
نجوم الليل بكام نظرة
و انا وحدى
وأشباح الضياع واقفة
بترقص فوق جثث دربي
ومش عارفة
ارتب بعضي من تاني
انا بعضي دخل على بعض
باشوف الشوك
بيتعفرت على الأسفلت
وبيقطع طفولة كلمة حيرانة ،
ولون النور هناك اتخض
وعيني في ضلمة المعنى
يخربشها سكوت الحرف و الموال
ومش شايفة ولا زهرة
وتاه مني السنن والفرض
و انا باجري
ورا ظلي
ومش عارفة الاقيني
انا تايهة
ومتلغبط بقلبي النبض
عشان غلطة
نزلت الأرض

شعر: ياسمين عبدالعزيز