ياقلبي بلاش

وباعت كل شيء عادي

كأنه ماكانش فيه بينا

لا ذكرى ف يوم ولا ماضي

كأنه ماكانش فيه عشرة

وكان فيه ع الوشوش

قشرة

وعشنا كل يوم قصة

وكات بتخبي مشاعرها

وانا اللي بقاسي من نارها

وآخرتها خلاص بعدت

وقدرت يوم على بعادي

وكانت نية مخفية

وبتمثل بكل هدوء

وبتربي الأمل فيا

وكات بتبان ملاك خالص

وعايشة بكل شفافية

وانا وقلبي اللي متغفل

سكتنا وقلنا عديها

وسلمنا الأمور لله

رضينا بعيشة مش هيا

صحيح طبع البشر قلاب

وصاحب الأصل متربي

وعايش باللي مقسوم له

وكان يكفيه كمان م الزاد

رغيف ناشف وكاس ميه

بداية القصة كالعادة

قديمة وبرضه متعادة

وأحداثها اللي عايشينها

بقت ملتوتة بزيادة

ومين يقدر يفسرها

ويختصر الحياه ف سطرين

دي قصة بتتولد في سنين

بتتربى

وتكبر برضه قدامنا

وبنقابل في تفاصيلها

حاجات وحاجات

دي قصة عشق بس مباح

وكان قلبك

ساعتها متاح

لكن دلوقت يا خسارة

بتشحن كل يوم في رصيد

عشان النبض يبقى براح

ودقة قلبك الحيران

هاتبعت لك رسالة ف يوم

تقولك للأسف يابني

نفد صبرك

وشحنك فاضي مايكملش

وباعت قلبي وسنينه

وأيامنا اللي عشناها

وأحلامنا اللي شفناها

خيال سارح

على قلوبنا

وياما ف لحن غنوتنا

كمان دبنا

وخادنا كتير من الأيام

وياما كتير كمان سيبنا

وماكملناش

وصبح الحلم في عنينا

مجرد وهم عاش فينا

وضاع كل اللي كان بينا

عشان من بدري مافهمناش

حكاية العمر والأشواق

بتتبدل دموع وفراق

ويفضل كل شيء فينا

غريب تايه ما يعرفناش

ومين ساب الحياه أصلا

وباع العشرة في الأول

عشان كان اللقا كدبة

وزيف ع الوش متلون

وعشرة كمان أساسها طناش

خلاص رديت بيبان قلبي

هاسطر آخرة الحدوتة وانهيها

بلاش تفتحها من تاني

عشان خاطري يا قلبي بلاش

عشان خاطري يا قلبي بلاش

شعر: محمد ياسين الكاشف