شعر/ عبدالرحمن مصلحي
“آخر ساعة”
اول ما صحيت
بصيت ف مرايتي ومش عارف انا فين ولا مين
واللي معايا ف قلب البرواز ده يطلع ايه
كان ملك الموت بيطل عليا من السماوات
بيقوللي خلاص فاضل ساعة وتموت ف سكات
سهمت ثواني وفجأة لقيت رن التليفون
صاحبي الباقي من لمة ناس مليانة بزيف
رديت بازيك عامل ايه
قام قاللي صحيت؟
انا قولت يادوبك لسه بفوق
وشوية كمان هطلع علي فوق
واستني اشوفك من تاني
*يا ابن العفاريت كمل كمل
هختمها بسرعة واسيبهالك
قام قاللي سلام
خبيت ف عينيا وداع ومشيت
ولقيت ف البيت
كل العيلة أمي واخويا
اختي وحواليها ولاد اخويا
صورة ابويا وخالي وجدي
والسفرة اتفرشت اكله صحيح أنا ما باكلهاش
وجريت علي واحد واحد فيهم أقوله بلاش
الليلة محدش يمشي بعيد
*سقفوا بالايد
وافتكروا ده شعر فقومت بكيت
كان فاضل م الوقت يادوبك
والله نسيت
قام ملك الموت خبط علي كتفي وقاللي اجهز
فاضل هفوات
ولقيت علي كتفي كمان ملكين
بيلموا ورقهم وبيمشوا
غمضت عينيا وقولت يارب
امهلني دقايق لو تسمح
الحق امسح كل ذنوبي ولو باستغفار
الحق اقول لآيه بحبك مع كل نهار
واقول لاصحابي بان وصيتي ماهيش انذار
ف اشهد بإن الله واحد مالوش تاني
وإن محمد العدنان رسولي حبيبي وامامي
ثواني وكان ملاك الموت
بيقبض روحي قدامي
