شعر/ محمد ابراهيم درويش
الوقت ساعات بيعدي عليك
وكأنه السيف اللي بيقسم ظهر الأيام
بتمر ايام على طرف عنيك
وتفوق وكأنها كات أحلام
لا بتصحى معاها ولا بتنام
ولا تعرف حاجة ف نبضاتك
ب تدُّق صحيح
ولَّا بتعلن بدء مماتك
أوقات بتكون عايش ميت
أو ميت عايش مش فاهم
يمكن أوقات بتكون واهم
يمكن ف حياتك بتساهم
ف ساعات وخلاص
مستني خلاص
من إيد الغيب ييجي يوصل لك
عارف أوقات تتمنى تعيش واحد تاني
أو يعني العمر اللي بيسقط منك
يرجع ينعاد
عارف في حاجات
بتخلي الضي اللي ف عينك يقلب بسواد
و بتبقا ساعات إنت المسؤول
ترجع وتقول
لو يعني أرجع طفل ثواني
لو يعني العمر استناني
والله ل أتوب
مع إن العمر اللي هيجي أصلا مكتوب
دي رسالة واحد عاش فيها
من واحد جاي شارد مهزوم
والعمر ف عينه ملوهش لزوم
بيشوف الدنيا بعين واحدة
بيشوف الأيام الجاية
تشبه ف الطعم سنين رايحة
إنسان ف الروح مقسوم ل اتنين
مبيتقابلوش
في واحد فيهم وشه بشوش
مستني الأيام الجاية
بيحاول بس يعدي السور
والتاني بصورة عليها رتوش
جوا ف برواز أصلاً مكسور
وما بين الإتنين حيران بيدور
مستني تروح بيه الدنيا
مستني وعشمان تتغير
يا سيوف الدنيا يا قاسمانا
شطرين ف الروح
عايشين ف الجسم اللي معانا
ف الشكل يبان وكأنه جديد
لكن مجروح
والجرح مغوط بين الاتنين
يا سنين الدنيا يا دوارة
إدينا لشمسك دي أمارة
أو طاقة نور
وطى لنا السور
خلينا نحاول نتعداه
مش كل ما نيجي نعدي عليه
ترمينا لتحت
ف أغوط فحت
وتردمي فيه
يا سنين العمر المحسومة
خفي شوية
ورينا الايام الجاية
شبه الاحلام
يمكن تهدى عيوننا الحية
وساعتها تنام
