شعر/ عمرو الأنصاري
“شر اعمالك”
مشيت ويا القصيد ضليت
وقعت ف شر اعمالك
ولولا الشعر كنت تشوف
بعين غيره ف أعمالك
وشدك من بيوت النص
لبحوره
تعوم في البحر 100 مرة
فدا عبوره ومبتعبرش
وتسرد نصك المفضوح
بعين بتبوح ومبتسترش
غريق جوا البحور معذور
وحاسس انها السكرة
فبتنمنم بحبة شعر
يمكن ينجدوك بكرا
وتحيا ف موتك الابدي
محدش فاهم التفاصيل
فمبنخفيش ولا بنبدي
غريق جوا البحور وحدي
وداير ابعت المراسيل
دليل ان كنت توصله
ف مش هتلاقي بعده دليل
دليلك شعرك الهزلي
في صورة ضحكة مش صافية
في نص حزين
بياخدك من سنين لسنين
ويرميك من بحور لبحور
تعيش العمر كله عبور
ومبتوصلش
مفيش تايه في أمواجه ومتأصلش
ومتفصلش على كيفه
مابين مده وبين جذره
وبين عدله وبين سيفه
ويرميك جوا دوامة
وتطلع منها بالعافية
فبتبص تلاقيك عالشط
وتايه برضه في القافية
سنين الشمس عالغلبان
في عز الصيف مهيش دافية
تمشي الورد عالاشواك
وتمشينا السنين حافية
وبرد يناير الفقرا
متبت في اللي ماله لحاف
في شيء في النص مش واضح
اكيد ده زحاف
وحذف بينكر الاسباب
وتد مفروق بيبعد عنك الاحباب
فتتغير بدون علة
وتاخد فاصلة م الشلة
تمل الحركة تهوى سكون
تكون في الدنيا كيف ماتكون
ومبتسلمش م الاقاوييل
وتفعيلتك خلاص ولت
وفجأة بقيت من المفاعيل
وفعلك للخليل موزون
وتصريفك بهذا النحو
تقول الكلمة في المضمون
وبرضه يكون كلامك حشو
ولما الشعر أوحالك
رضيت تغرق في أوحالك
وروحت بعيد عشان تكتب
قصيدة شر أعمالك
