توب من حديد

 من سر خطوات العبور فى الكون

انك تعدي من شرنقات الليل
تعصر فى روح الصمت
تُأمره بحبة حروف
تكسر حلوق الصبر. تقوله انطق
إتوجع…
اصرخ واقول موجوع اوي
إكسر سكاتك بالقوي
وكفاية دفنك تحت كلمة يستحيل
وبلاش تكرر من حروف انا مش هعيش
يمكن تعيش
وتعيش اوي
..
وبلاش تكمل فى الحياة
زي دراويش الكلام
بيسبّحوا بسبحة غرام
مفروطة حباتها فى ظلام
والكدب صابح وِردهم..
والفرض حي على الحرام.

خليك جدع…
عارف حدود الحلم ايه
ومسطّره بالمسطرة،
راسم على ورق الزمن
كل الزوايا والضلوع
شافف فى صورتك
، ساعة الخطر ،
راسم حدود الخطوة ايه
عارف تمام وقت الرجوع

جوة السطور
تنطق ملامحك
وتقول هناك واقف بطل
وفى قلب ملحمة الحياة
بيهد كل طريق غلط
وبيبني تانى ومن جديد
كل الطرق لـــــ الله

ومن قساوة الحرب ممكن
يسكن فى قلبك…
أشواق غلط
إياك تخاف..
إرمي شراع الضعف فيك
غرّق سفينتك وبـــ إيديك..
افرد جناحتك وطير
خليك قوي
وإياك تبص وراك للحظة
فى العشق قلبك كان قوي
فى الجرح قوّيه مرتين..
..
واياك تقول توب الحياة
واسع عليك
وان كان اكيد
فصّل لقلبك مالحديد ..
توب من جديد.. وإنزل وحارب
واضحك وقول انا قدها
اقوى ودوس
… على كل صورة ماتشبهكش
شد الطريق
وارسم خطوط الصح ايه
.. وامشي عليه
واياك يشدك
لون الفتن فى كاسات..
كله منفات
واصبر تنول
كاس الفتن ما هيشبعكش
واعرف حقيقة…
فى الحياة
توب الحديد لايق عليك
شعر: رباب لجورية