“كبرنا ازاي؟”ولسه المَية اهي دافية ما بردتشي

شعر/ علي الملاح

كبِرنا ازاى ؟

ولسة المَية اهي دافية ما بردتشي في مج الشاي

كبِرنا ازاى ؟

دى لسة الأبلة كات واقفة تبَكتني عشان رغاي

يَجوز أحلام 

يَجوز دى هواجس القعدة قُصاد الفيديو والأفلام

يَجوز دلوقتي راح قُدام !

كبِرنا ازاى ؟

ما لسة البيت اهو مايل وبيعيط من الزِلزال 

ورُبع جنيه يجيب كولا

وفيلم السهرة ع الأولي 

وبنخاف لسة مِ الغولة 

كبِرنا ازاي من الخارج ومن جوانا لسة عيال

هايجي الجوهري دلوقتي وجنبُه حسام في أيدُه الكاس 

بابور الجاز عشان يولع هاياخُد نفحة مِ الكباس 

وتاكسي السهرة هاياخدنا 

على السنيورة والأقزام

أمستردام بقت أحلي 

عشان شوفناها من همام

ولسة على القناة التالتة 

كمان ساعتين هايجي ونيس

وشادية في أخر الليلة 

هاتاخد تارها من عتريس

كبِرنا ازاى وأمتى وفين ؟

وفات كام ساعة مِ الألفين ؟

مراية بيتنا كدابة عشان بتغير الصورة

عيال وبنلعب الكورة

ونرسم كعبةع الحيطة عشان جارنا اللي جاي مِ الحج

وأنضف حد في صحابنا معاه نوكيا وخط كليك

كبِرنا ازاى ؟

كبِرنا ازاى قُصاد عينكُم ولسة قُصادنا ما كبرناش؟

أكيد الوقت مِتعور ومِحتاج بس قُطن و شاش