صباح الورد ياغالي
خيال الضل
أنا الكف اللى متثيت
علــى بيوتهــا
ومتخضب بريق مواويلها وسكوتها
وتنكيتها وتبكيتها
أنا المركون على صوتها
وسهم الليل بجبروته
يبان ضعفه أمام رسمى
فى شهقة ضل عتمتها
أنا المحذوف
من الخانة اللى بتجمع
عيون مكسورة ومهانة
بكاس المهزلة والذل
خيال الضل تعاريجه
بتستقوى على سطوتها وعنادها
وأمجادها وعبادها
على اسيادها وأجدادها وأحفادها
على زادها وزوادها
بيحبطها
ويشعل فى القلوب زيتها
ويتونس بلمعة فص قهرتها
وكسرة نفس نبوتها
أنا الغازل .. وانا المغزول
نسيج بيكر حواديتها
ألقح توبها عن كتفى
يفور جلدى
وصوتى عزوتى وسندى
يمارس طيشه وجنانه
ويرفع سقف عصيانه
لأعلى التل
خيال الضل
يتمرد على غضبى وهذيانه
يثور ويجور
ويرشق ف الهوا ودانه
ويرشيها
فتتمرمط ف أحضانه
وتكشف للخيال سترى
وتفضحنى
يعشينى بتفتيشة
يهنينى .. ويخطب ايدى بغويشة
أشارك فيها سجانى
يجرجرنى على الكوشة
يقول تاااانى ؟
شبكتك 300 نوبة
أقول كفيت
وأعلن للخيال توبة
يكعبلنى علاء الدين
ويتغزل فى مصباحه
ويهدى لقلبى أرواحه
يقول شبيك
أقول يافكيك
أفرط سبحة الأيام
سنين تجرى
أفوت مهرى
وطرف العد من ضهرى
ألم السبحة والضمها مع المماليك
بفردة وش بتغازل بنات الشمس
فتضحك لى
تكلفتنى بكسوتها
وبالمح طرف سنتها
بيلعن رحلتى والأمس
يسبح فى الوجود مولاه
أقول الله
ياروعة نورك الفدادين
ياعهد متين
بيفرش ضيه للتايهين
ومايدومش الفرح ساعتين
أصادف حفنة م التجاعيد
سواقى أنين
على الزيبق كئيب وحزين
برعشة خوف بيسألنى
ملامح سحنتك هادية بتنطق بشر
جنابك ميــــن ؟
أنا م الحادى والعشرين
وهارب من خيال الضل
بكلمة حق بتفنجل عيون الكل
يسرب ضحكته غصبا وسخرية
علي الزيبق بيطلبها سواسية
يثور عمدا
يموت كمدا
ويتخفى من الجواسيس
وزمرة من العسس دايرة بحرية
وحريــــــــــــة ..
بتسبح ف الفضا المزنوق
كمـــــا هـــــي
بتتعلق فى ديل مماليك
جواز كاثوليك
وتستقوى على المساكين
أفرط سبحتى عكسا
أقول يا فكيك
يرجعنى علاء الدين
…………………..
شعر: أشرف البنا
