اسأل سماسرة الانهزام

اسأل سماسرة الانهزام

متر الوطن يتباع بكام ؟
وأبيع لمين ؟
والعملة حدد صنفها
من الدينار ولا الدولار ؟
ولا م الصنف الحزين ؟
والدفع كاش
ولا تقسيط وببلاش ؟

صب اللعان
على كل أولاد اللئام
واشحت سنين
بديلة للعمر اللي عدى
وانت بتشد الحزام
وهات شهود
من نفس نوعك والملامح والعيون
والعينة
بالاختصار
قدم عروضك بالدليل والبينة
جهز مقال

واكتب في أعلى العرض حال
المحرومين من بكرة
اشباح زينا
وبيبصموا على انهم
في الضلمة مقطوع ندرهم
متشوقين يتنسموا طرح النهار
والليل ضرير

أعرج بيحبي بعكازين
عسعسته ع الفجر بقلق
واحنا ف قوائم الانتظار
متطعمين قهر وزهق
ومخلوقين
لحراسة الليل العنيد
ما احنا العبيد
مساجين في زنزانة الوطن
بدون أساور أو حلق
من فعل أصحاب الجشع
المفطومين
على صدر مخلوق من طمع

شعر/أشرف البنا