أحلام اليقظة
عشوائي لأنك ما قدرتش تعشق
على قد حدود ايدك
عشوائي لأنك صدقت
أن أنت في روح نبض حبيبك
هتصدق يعني لو اقول لك
أن أنت بتعشق تكذيبك
عايش في الوهم
ولكنك
فرحان ب عذابك ولهيبك
طب خدها نصيحة مني اليك
هتعيش وتموت
ولا عمرك لحظه راح تلقى
اللي يحبك واللي يصونك
طول ما انت عايش اوي بيهم
وعيونك لم تقوى عليهم
بتشوفهم دايما قد الكون
محتاج لنصيب لتكون جواهم
وتعيش بالحب نصيب وياهم
وتحس ان انت اكيد بيهم
والجنه مابينكم سور موصول
بيضم الفرحة والطرحة
ويضم القسمة المطلوبة
والحب كفيل
والنبض مابينكم كله نجاة
لأصول العشق المحصور
في حدود ايده
فنفوق من لحظة للتانية
ونموت بشحوبه وهذيانه
ونعيش من تاني بنعاني
متلازمة حبي المهزوم
ولا طولت النور
ولا حتى الضلمة
مشاعرنا مقتولة بكلمة
اننا يمكن هنفارق
او يمكن بكرة يكون لينا
غنوة وحدوته سمعناها
في كل الروايات
القلب حقيقي بيعافر
محتاج لروحه حبيب وافي
ويغير كل سطور العشق
بين كلمة وكلمة
ونظرة وهمسة
وروح متجانسة
فنتوه من تاني في معانينا
فتشكل روحنا كتير احداث
بين ناس وناس
والحب مجاز
فنعيش ويانا ومعاهم
بس في (أحلام)
………………
شعر: منال محمد
