حاصل علي دبلوم
من شاب بيحلم انه ي
بات مستور
لشوية نور
تايهين فى ايدين الدنيا
ومش عارفين
مين المقصود
خايف من كَسرِة ضهر الحلم
وظهور الحزن ف اخر الفيلم
والتتر ينزّل حكايتهم على نغمة عود
انا واحد من وسط تاريخ
سايب اعمارنا ف صندوق بخت
خلانا نخيط حلم طفولة اتربى زمان
فى مخدة بتسند نومِة عيّل نام مبسوط
علشان كان حالِل واجب صعب
كان راسم بالطو من الطباشير
على سقف مسلح غرقان
جوه كليم مقطوع
ورجول طبلية بتجمع ٦ أخوات عايشين
على لمبة بتعكس ضل كتاب
ف يبان محلول
ف تنور كل حيطان البيت
على كلمة نِفسك تطلع ايه
انا اقول دكتور
و دي كانت أمنية عيّل
كاتب على كل الكشاكيل دكتور انسان
كان فاكر حلمه اللي بيكبر
يشبه طيّارته الضايع من احلامها الخيط
كان حلم عبيط
خلّانا نضيع ف التعليم شهرين
من فوق خمسة وعشرين
والناتج طالب متميز
حاصل على ورقة بختم ضعيف
مش جايبه ماهية عامل مات
الحلم الكان عايش دكتور
موصلش لعامل فى الاشعات
من أول سلم ف المبني
للدكة اللي خشبها حفظني
يشهدوا على ورق الامتحانات
على سهر القلم اللي كرهني
من رعشة ايدي اللي بتكتب نص الكلمات
انا واحد علق ع المسمار
احلام فى شهادة بتتمرجح
وانا راكب على كرسي دليفري
من غير البالطو اللي رسمته
ف كراسة الرسم
انا هفضل ميت وانا عايش
دكتور بالاسم
شايل ف دولابه المحروم
حلمه الكان عايش فى زراير مريلته البيج
وبيكبر على تختة قديمة
على كشف اسامي ف ايد استاذ
كان خايف يشرح فى الحصة
يتأخر على شغل اضافي
على لعبة كورة بتختارني
من وسط الناس العب حافي
وارجع هلكان من تعب اليوم
انا واحد كان عايش يحلم
لقى نفسه الحاصل على دبلوم
……………….
شعر: محمد طلعت
