شعر/ نجلاء السيد
صوت زعيق الريح
والسما بتبكي وتحكي للعالم
عن سر حزن الناس
ف صوت عديد الأم
وصرخة الأخوات
وقت اما روحك فرقت الدنيا
خطاويك اللي كانت
مصاحبة السكك
وبتشكي للأسفلت
عن نخلة وقعت من عيونك
عرشت ع الارض
تتشعلق الأحزان عليها
صوت صريخ العيال
وخوفهم من المجهول
عيال بتلحق
بعضها وبيسبقوا الخطوات
هرب الونس م البيت
وإتكست جدرانه بالغربة والحرمان
ورغم الاتامه والعتمة في الألوان
هرب الونس
ف البيت صبح عريان
مات اللي كنا بنضفر
خيوط الصبح بعيونه
ف نشتهي الرحلة
جوايا خوف بياخدني
لحد باب مجهول
وانا كنت بجري بعزم ما فيا
وكنت بسبق خطوة الدنيا
وف قلبي أسرار مبتنتهيش بالبكا
البكا أسرار مبتنتهيش بالبوح
والبوح حقايق مش كلها ظاهره
بنص معزوفة حياه عايشه
وبنص قلب بشتهي الباقي
مجذوبة روحي لحد باب قبرك
وبتسقي صبارك بالدموع يعطش
مفزوعة جدا من حاجات عايشه
ف تشدني الايام
لحد باب الوحده
وابقى روح بتداري
في حضن الحنين
وعيال بتتصارع على مين هايسبق مين
وبموتك
فضيت بكارة الروح
فااتبعترت أسرار
