شعر / محمد يوسف حامد
“إسنا”
قلبى اللى سبته
تحت شجرة موز ف إسنا
و مشيت لوحدى
أعاين وشوش الشوارع
يمكن ألاقى صورة منك
جنب مستشفى الرمد
أو حتى عربية ( الشغب )
أنا كنت ميت م التعب
و أنا بحضن إحساسك بخوف
كان الشادوف يدلق دموعه
و تشربى
و قبل ما تكبى حنينك أتوجع
و أرجع لإدفو
فاقد الإحساس بشاعر
كان بيرسم بالحروف
جنة عدن
و قلب طيب
لسه نايم تحت ضل الموز
وحيد
يتهجى تغريد البلابل
لجل يغنى
و يكبت مشاعره المؤمنة
بيكى
و بالنجوم الواقفة
حراس للسما البرفان
من شهر نيسان اللى فات
كانت حبيبتى المغرمة بالشعر
بتصدق المجانين
مع إنى مش مجنون قوى
أنا بس سبت القلب
يتأمل مشاعرك
و يصور مشاهد
ناقصة م الألبوم
لما كنا تحت شجر الموز
بنلعب
و نرسم أملنا المستحيل
بالطين.
·
