ثقافة و فنمصر اليوم
احسب عمرك
باحسب عمري
ضِفت ف خانة العشرة تلاتة
بعد كتير م العمر ماعدى
لسة تلاتة !
دة اللي قالوه…
قلت العمر تعالوا هاتوه
الحرمان يجى كام من عشرة
والخذلان الضِعف وأكتر
والأفراح ع الهامش عدوا
كام ضحكاية وحبة سكر
لجل يحلي العمر الجاي
شفتوا الدنيا غريبة ازاى!
خانة العشرة حقيقي تلاتة
بس ف حاصل ضرب ميتين
واما القسمة تكون على عمري
يبقى الناتج صفر متين
يعنى ان قلت عليا كبيرة
برضه اكيد ليا ضفيرتين
زي تمام أصعبها معادلة
ماهي دنيتنا كمان مش عادلة
احسب عمرك شوف كام دمعة
شوف كام ضحكة وولع شمعة
انسى الماضى وعيش الحاضر
مالأيام أهي شايفة وسامعة
شعر: فاطمة الصعيدي
